يـاليل انا وياك والهم والنار
وجمر السنين اللي بصدري شبايب
ودلال محكور بها كيف الامرار
وفنجال لوعات السهر صار رايب
الدمع ماها والصبر بن وبهار
ومعبارها صدر ضلوعه حطايب
أجرع طعون الوقت حنضل وصبار
من علقم الدنيا روينا مصايب
صارن ضلوعي للهواجيس مضمار
وشين البخت خيل ذيوله سبايب
تكانفتني واعلنت حرب وحصار
لين أحتواني جيشها والكتايب
واخذتلي مع غيبة الشمس مغوار
حتى وقفت بعالي الجال هايب
وضليت أحسب الوقت وادير الافكار
ومن وين مالديت شفت العجايب
ورسمت بالوان الشفق همس الأشعار
من لونه الخمري ودم الصوايب
نقشتها بالرجم سيره وتذكار
على صفاة الشوق والنور غايب
يوم المساء غطت محيطات الأقطار
وأدلج ضلامه مثل صفر الركايب
شبيت نار البوح مع صوت غيتار
صوت الشمال اللي تغيض الهبايب
ياليل خذني في سماء الوجد مشوار
بين النجوم المرقبه والسحايب
هناك بانهي قصتي واطفي النار
واطوي بساط الهم بكفوف شايب٠*
الخميس أغسطس 13, 2009 10:41 am
المزاج : 
